Exo 32 | TVK | STEP |

a 32:32 Luk 10:20; Rev 13:8; 17:8; 20:12; 21:27

Exodus 32

7 Melele xa moletin xil di tamu lapol ni mak, Iahova biteni mi Mosis bit, “Utemanon uhe tan vengan xa moletin nam xil xa oteleh rerat xil ra hal Isip, sexien nae xil mikavui e polien nae xil pupuru tang. 8 Xil latemanon e labe reling suse xa natehit xati tengan ti lihusil. Lapol ni buluk tei ni gol e di lamot mini. Xil di labas vin vongoro sae xil ven, e di lasa ni be sanien eo nae mini. Xil di labiteni labit nanao ak iaxa be hi nae xa teleh rerat xil ra hal Isip. 9 Nakila xa xil labe vatxeih xil. 10 Ieok nggat pupu ni xil e, taxeak, nimu len xil vus vari tengan lihe tovuol mun. Onasak pisi ti tengan onahiles nenemien navan vengan nipol ni ixoni ngan xa ieok bei. Ti, nipol ni xouk itel vatimol nam mei ihe kantri tei xa eilep.”

11 E Mosis dak kes Iahova, Hi nan, bit, “O Iahova li, otepol e rin nae texo sexien xil hao ngamu xa tellep. ?Veneh ma iem nggat moletin nam xil xa xouk oteleh rerat xil ra hal Isip texo xeihen nam xa eilep? 12 ?Veneh ma upol ni mol-Isip xil ti lihiteni xa xouk oteleh rerat moletin nam xil ra hal Isip tengan mei opurun xil e vathu xil, e omu len xil tengan lave tovuol mun? !Iem naat xil ti li, uhiles nenemien nam e onasa ti mun pangasien naha mi xil! 13 Unem xat Ebraham, Aesak e Siekob xa latbe moletin te polien nam xatel. Unem xat hitxatien te xeih xa otepol ni tetel xatel. Otehiteni otehit horamue natel xil mei lihe holu xa lihe holu pupu lixoni hitu xil te tilang hat. Otehit xati mi xatel xa usa tan tei xa mahulong ihe na ngan xil xa listal lixo vatimol natel tengan liti en vehakut.” 14 Melele xa Mosis biteni mak, Iahova biles nenemien nan e tasa ti mun pangasien mi moletin nan xil vaxoni ngan xa tehiteni.

15 Di, Mosis misuvul mun be tan e mileh rae xil na Hi xa xi tesehi teti e rin xalu vus te hat lu.

19 Melele xa Mosis bemei sangas visal moletin xil, xi pusi xa xil di labol lakapis xol buluk xa latepol ni. Melele xa pusi mak, ien mikat xa mikat, ma mileh hat xalu ak e minggo len xalu e pe vathu ak. 20 Di, po rat buluk xa latepol ni e miso ni be upang. Upang mingga ni ba vuma ... mileh. Di, Mosis miti mei be vulmeas, miso ni be oei, e minggeih xat mol-Isrel xil vus tengan lamu ni.

21 Di, Mosis biles pus Eron e biteni mini bit, “?Moletin xil ak latepol ni naha minuk iaxa xouk oteleh tesaen tellep xil ak temei tepurun xil?”

22 Eron bit rilomun ni mini bit, “Mosis, suv navan, iem naat pupu ni nou ti li. Xouk okila xa moletin xil ak, vehakut labit ti lapol ni sexien xil xa misa. 23 Xil labiteni minou labit, 'Xamem matakil ti naha iaxa nggul Mosis xai xa teleh rerat xir ra hal Isip. Ma upol ni hi tova xa mikila itel xir riha.'”

30 Ut milan, Mosis misomal pe met moletin xil e biteni mi xil bit, “!Xamim mupol ni tesaen tei xa eilep pupu! E xosali, inou itilomun nihe nesao e nihisu mi Iahova. Nahe xos nikila nitak kesi tengan ipisen esaeen nan mi xamim e naketeh ti mun nasa ni xamim ve tesaen xa mutepol ni.” 31 Ma, Mosis dilomun be visal Iahova e biteni mini bit, “!Aue li! Moletin xil ak lapol ni tesaen tei xa eilep pupu li. Lapol ni hi tei ni gol e lamot mini. 32 Nadak kesuk li tengan uketeh ihos li mi xil. E xosxa iem ti navei, ma usu len hisok mun ra Vanuvei te Meulien ^a xa di odis xat his moletin nam xil di en.”

33 Ma Iahova bit rilomun ni mini bit, “Ngan xil kestang xa lapol misa minou, nisu len hisexil ra Vanuvei te Meulien navan. 34 Ha utel moletin xil muhe rute xa natehiteni tuei minuk. Unem xati xa masxaxa navan itiamu ni xamim muha. E bos xa xouk ukila xa melengien tei imei xa inou nisa pangasien mi xil ve tesaen nae xil.” 35 Misak ni, Iahova misa meseien tei xa eilep ba xat moletin xil ve buluk xa latexeih xat Eron tengan vapol ni.